انا جايبة النهاردة وصفة جميلة جدا وسهلة جدا جدا وتنفع في العزومات بتكون طبق جانبي ممتاز وشيك جدا وجميل وهي الكانيلوني المحشي بالفراخ والجبنة وطبعا انت ممكن تحشيه اي حاجة تحبيها بس انا بحب اعمله بالحشوة دي عشان بيكون طعمها حلو جدا في الكانيلوني
نشوف بقى هنعمل ايه وندخل على المقادير والطريقة
أولا:- عجينة الكريب
مقاديرها عبارة عن:
كوباية دقيق
عليهم كوباية لبن
وبيضة او بيضتين زي ما تحبي انا هنا حطيت بيضتين وعليهم رشة ملح وفلفل وضربتهم كلهم في الخلاط عشان ميبقاش فيها اي كلاكيع
وده كده شكلها بعد ما اتضربت هي بتبقى سايلة كده يا بنات
وخلاص كده بعدين عشان نضبط حجم الكريب فانا بحطه في فنجان صغير عشان يبقى كله حجم واحد
وبعدين بنجيب طاسة تيفال سخنة ونحط فيها نقطة زيت بسيطة جدااااااااا وننزل عليها بالخليط اللي في الفنجان ده ونوزعه بسرعة في الطاسة عشان يبقى متساوي
نسيبه كده دقيقة واحدة بس لحد ما يحمر وبعدين نقلبه على الناحية التانية
ونسيب الوش تاني يحمر وبعدين نشيله بقى ونحط غيره لحد ما كلهم يبقوا جاهزين على حسب الكمية اللي احنا عايزينها انا المقدار اللي عملته ده عملي 5 واحدات الحجم ده
تاني حاجة هنحضرها بقى هي الحشوة وانا استخدمت هنا صدر فرخة مسلوقة وحطيت عليه جبنة شيدر وزيتون اسود واخضر وممكن نحط عليه تركي مدخن لاني بحبه في الحشوة دي جدا بس انا ممنوعة من الحاجات دي عشان الحمل
تالت حاجة بقى نحضرها هي البشاميل وده طبعا بيتعمل عادي جدا وانا بصراحة بستسهل وبحط الزبدة على الدقيق على اللبن والماجي والملح والفلفل وجوزة الطيب واضربهم في الخلاط وبعدين احطه على النار دقيقتين بس يسخن ويتقل وكده مش هيكلكع ولا تتعبي ايدك في التقليب كل شوية
بعد كده نحضر بقى البايركس او الصينية اللي هتعملي فيها وتدهنيها من تحت بشاميل كويس
وبعدين نجيب الكريب وندهنه بشاميل كويس جدا وبعدين نحط عليه الحشوة
وبعدين نلفهم و نرصهم في البايركس ونحط عليهم باقي البشاميل ونرش عليهم جبنة موتزاريلا وممكن شيدر كمان زي ما تحبي
وتدخليها الفرن تقريبا حوالي تلت ساعة وبعدين تولعي الشواية شويةعشان تحمر من فوق وده بقى شكله لما طلع من الفرن هو كان عايز يتحمر شوية بس عشان بصراحة كنت مستعجلة
